गुल्मीका अग्नी पीडितलाई गोकर्ण बिष्ट आग्रह तिनै तहका सरकार मिलेर आवास हुन्छ

अनिल खत्री

१५ वैशाख, गुल्मी । गुल्मीको इस्मामा लागेको आगलागी क्षेत्रमा प्रतिनिधि सभा सदस्य गोकर्ण बिष्ट पुग्नु भएको छ । इस्मा गाउँपालिको सिदुङ्खा, हाडीखोला, मड्किना र कोटकोटरीका आगलागी पीडितलाई भेट्न बिष्ट क्षतिग्रस्त क्षेत्रमा पुग्नु भएको हो ।

गत शनिबार बिहान जंगलमा लागेको आगो तिव्र गतिको हावाहुरीका कारण बस्तीमा पुगेको थियो । बस्तीमा आगलागी हुँदा इस्माका मात्रै २६ घर जलेर पुर्ण रुपमा नष्ट भएका थिए । आगलागीबाटै ४९ बंगाला (दुई तले गोठ) जलेर पुर्ण रुपमा नष्ट भएका थिए ।

प्रतिनिधि सभा सदस्य बिष्टलाई इस्मा गाउँपालिकाका अध्यक्ष भगतसिंह खड्काले आगलागीबाट भएको क्षति, राहात र उद्धारको कामको बारेमा जानकारी गराउनु भएको थियो । गाउँपालिका अध्यक्ष खड्काले गाउँपालिकाले आगलागी हुनको दिन आगो नियन्त्रण र अर्कोदिनबाट तिव्र राहातको काम गरेको बताउनुभयो ।

तत्काल खानेपानी व्यवस्था, जीवनजल पानीको व्यवस्था, बास बस्नको लागि व्यवस्था, खानाको व्यवस्था, पशुचौपायलाई घाँसको व्यवस्थाा, खानेपानीका लागि पाइपको काम, विद्युत्को काम र विद्यार्थीको ड्रेस लगायत अन्यका कपडा सिलाउन आगलागी क्षेत्रमा टेलरिङ मेसिन पुराएकोदेखि घर निर्माणका लागि तत्काल प्रतिघर एक लाखका दरले आर्थिक सहयोग गर्ने निर्णय गरेको इस्मा गाउँपालिका अध्यक्ष भगतसिंह खड्काले जानकारी गराउनु भयो । खड्काले गाउँपालिकाका जनप्रतिनिधि, कर्मचारी र अन्य सहयोगी स्वयंसेवक बनेर घर पुनःनिर्माणका लागि भग्नावशेष संरचनाहरु हटाउने कार्य भइरहेको बताउनुभयो ।

आगलागी पीडितले प्रतिघर पाँच लाख रुपैयाँ घर पुनः निर्माणका लागि पाउनेछन् । जून संघ, प्रदेश र स्थानीय सरकारको साझेदारीमा चार लाख रुपैयाँ दिइनेछ । बाँकी एक लाख रुपैयाँ गाउँपालिकाले दिने गाउँकार्यपालिकाले यसअघि नै निर्णय गरिसकेको छ ।

हाल विभिन्न संघसंस्थाबाट आगलागी पीडितलाई सहयोग भइरहेको छ । वर्षायामको समय सुरु हुन थोरै समय मात्र बाँकी रहेकोले त्यो भन्दा अगाडी नै घर बनाउनका लागि गाउँपालिकाबाट तिव्र रुपमा पीडितको क्षेत्रमा काम भइरहेको छ ।

शुक्रबार बिहान प्रतिनिधि सभा सदस्य गोकर्ण बिष्ट रेसुंगा विमानस्थल ओर्लिएर सिधै आगलागी क्षेत्रमा पुग्नु भएको थियो । बिष्टले तिनै तहका सरकार मिलेर आवास निर्माणमा जुट्ने प्रतिबद्धता ब्यक्त गर्नुभयो ।

पीडितको दुःखमा आफू पनि सहभागी भई सामना गर्न क्षतिग्रस्त क्षेत्रमा आएको उहाँले बताउनुभयो । बिष्टले यसअघि नै काठमाडौंबाट खाद्यान्न लगायतको सहयोग पठाउनु भएको थियो ।

 पीडितलाई आगामी छ महिनासम्म पुग्ने खाद्यान्न संचित गर्न आग्रह गर्दै खाद्यान्न नभएमा आफूले सहयोग गर्ने बताउनुभयो । बिष्टले केही समयअघि पहिरोले इस्मामै क्षति गरेको स्मरण गर्दै बिपत्ति आइरहेपनि सामना गरेर अगाडि बढेको बताउनुभयो ।

उहाँले संरचना पुनः निर्माणको प्रक्रियालाई छिटो सकेपछि पीडितले समयमै रहात पाउने र त्यसका लागि आफूले पहल गर्ने प्रतिबद्धता जनाउ नु भयो । प्रभावित क्षेत्रका नागरिकलाई हतास नहुन बिष्टले आग्रह गर्नुभयो ।

इस्मासँगै मदाने गाउँपालिकाको घडेरी पनि आगलागी बस्दीमा पुग्दा घरहरु जलेका थिए । मुसिकोट, धुर्कोट र मालिकाको क्षेत्रमा पनि आगलागीले क्षति पुराएको छ । बिष्ट गुल्मीका पश्चिम आगलागी क्षेत्रमा शुक्रबार बिहानैदेखि पुगिरहनु भएको छ ।