गुल्मीमा खोलाले बगाएर एक जना बेपत्ता

गुल्मी, भदौ १६ । गुल्मीमा खोलाले बगाएर एक जना बेपत्ता भएका छन् । जिल्लाको चन्द्रकोट गाउँपालिका – ८ मजुवा निवासी मनबहादुर कुमालका १६ बर्षीय छोरा असिम कुमाललाई आज बिहान खोलाले बगाएको जिल्ला प्रहरी कार्यालय गुल्मीले जनाएको छ ।

आइतबार बिहान ८:३५ बजेको समयमा बडिगाड खोलामा जालबाट माछा मार्ने क्रममा कुमाललाई अचानक खोलाले बगाएको जिल्ला प्रहरी कार्यालय गुल्मीका प्रहरी नायव उपरिक्षक शंकर पोखरेलले जानकारी दिनुभएको छ।

स्थानीयले उनलाई खोलाले बगाएको प्रहरीलाई जानकारी गराए लगत्तै प्रहरी चौकी मजुवामा खबर गरेका थिए । घटनाको जानकारी पाएलगत्तै प्रहरी सहायक निरीक्षक रामबहादुर कार्की , सशस्त्रका सहायक प्रहरी नायब निरीक्षक खडग पेमीको कमाण्डमा टोली घटनास्थलमा खटिसकेको छ । खोलाले बगाएर बेपत्ता बनेका कुमालको स्थानीयहरू सहित खोजी कार्य भइरहेको प्रहरीले जनाएको छ ।