सात करोड भन्दा बढीको लगानीमा मालिकाले बनायो प्रशासनीक भवन

गुल्मी, ४ फागुन । गुल्मीको मालीका गाउँपालिकामा नयाँ प्रशासनीक भवन निर्माण भएको छ । संघीय सरकार र स्थानीय सरकारको सात करोड ६७ लाख १८ हजार लागतमा उक्त प्रशासनीक भवन निर्माण सम्पन्न भएको हो ।

मालिका गाउँपालिका –४ अन्तरगत अर्खावाङ्गमा उक्त प्रशासकीय भवन निर्माण गरिएको छ । विकोइ श्रेष्ठ तथा सुनिल समिर जेभीद्वारा २०७८ भदौमा सम्झौता भएको भवन निर्माणको काम तीन वर्षमा सम्पन्न भएको गाउँपालिका अध्यक्ष देवीराम अर्यालले जानकारी दिनुभएको छ ।

जिल्लाको दुर्गम पालिकाको रुपमा चिनिले उक्त मालिका गाउँपालिकामा सुबिधा सम्पन्न भवनबाट सेवा प्रबाह गरिने भएको छ । भवनको संरचना अपाङ्मैत्री रहेको छ । अपाङ्गता भएका कुनै पनि व्यक्तिहरु सहजै कार्यालयको कोठा कोठामा पुगेर सेवा लिन सक्ने बताईएको छ ।

२२ हजार स्क्वायर फिटमा बनेको सो भवन साढे तीन तलाको रहेको छ । भवनमा बैठक कक्ष र सभाहल सहित १६ वटा कोठाहरु रहेका छन । गाउँपालिकाको मुख्य केन्द्रमा निर्माण गरिएको उक्त भवन आकर्षक डिजाईनमा निर्माण गरिएको छ ।

भवनको अभावमा गाउँपालिकाले सम्पूर्ण प्रशासनीक कामहरु एउटा सानो ट्रसबाट गर्दैै आएको थियो । सानो ठाउँ र साघुँरा कोठाहरु भएका कारण सेवा लिन आएका नागरिकहरु पनि अलमलमा पर्ने गरेका थिए । अब नयाँ भवन बनेपछि आफुहरुलाई पनि सेवा लिन आउँदा सजिलो हुने स्थानीय राधिका अर्यालले बताउनु भयो । पालिकाले यति ठूलो भवन बनाएको भन्दै उहाँले खुसि व्यक्त गर्नुभयो ।

नयाँ भवन नर्माण भएसँगै अवदेखि नागरिकहरुलाई सेवा प्रवाह गर्न थप सहज पुग्ने मालिका गाउँपालिका उपाध्यक्ष उपेन्द्र अर्यालले बताउनु भयो । भवन निर्माण सम्पन्न भएपनि फर्निसिङ्का कामहहरु गर्न केही बाँकी रहेको कारण नयाँ भवनबाट सेवा प्रवाह गर्न केही समय लाग्ने उहाँले बताउनु भयो ।

जिल्लामा एकै दिन बोलपत्र आव्हान गरेका धुर्कोट र मदाने गाउँपालिका प्रशासकीय भवनहरु भने अझै सम्पन्न हुन सकेका छैनन् । एक पटक म्याद थप गरेपछि तोकिएको समयमा काम सम्पन्न गरेर पालिकालाई भवन हस्तान्तरण गरिएको निर्माण व्यावसायी हरिकुमार श्रेष्ठले बताउनु भयो । उक्त भवनको हालै नेकपा माओवादी केन्द्रका अध्यक्ष एवं पुर्व प्रधानमन्त्री पुष्पकमल दाहालद्वारा (प्रचण्ड) उद्घाटन गरिएको थियो ।