गुल्मी–चारपाला रुपन्देही समाजद्वारा तेश्रो रनिङशिल्ड हाजिरी जवाफ प्रतियोगिता

रेसुंगा सामाचारदाता गुल्मी, २७ जेठ । गुल्मीको गुल्मीदरबार गाउँपालिकामा विद्यालय स्तरीय तेश्रो रनिङशिल्ड हाजिरी जवाफ प्रतियोगिता सम्पन्न भएको छ । लामो समयदेखि सामाजिक क्षेत्रमा क्रियाशिल गुल्मी चारपाला रुपन्देही सम्पर्क समाजको आयोजना तथा मीरा कोषको व्यवस्थापकीय सहयोगमा गुल्मीदरबार गाउँपालिका ६ अन्तरगत गंगा आधारभूत विद्यालयमा उक्त कार्यक्रम सम्पन्न गरिएको हो ।

प्रतियोगितामा ठुलापोखरा माध्यमिक विद्यालय प्रथम, शारदा माध्यमिक विद्यालय द्वितिय, ईश्वरी माध्यमिक विद्यालय तृतीय तथा गंगा आधारभूत विद्यालय शान्त्वना भएका छन् । प्रतियोगितामा प्रथम हुने समुहलाई ९ हजार, द्वितिय हुने समुहलाई ६ हजार र तेश्रो हुने समूहलाई ३ हजार रुपैयाँ सहित पुरस्कृत गरिएको थियो । द्वितिय पुरस्कारको सौजन्य पुर्व शिक्षक वीर बहादुर खत्रीले गर्नुभएको थियो भने तेश्राका कुल बहादुर महत र सान्त्वनाको आत्माराम पन्थीले सौजन्य गर्नु भएको थियो । समाजका सदस्यहरु सुमित्रा टण्डन, जीवन कार्की, मोहन कार्की, काजीमान टण्डनले विपन्न विद्यार्थीहरूलाई प्रति विद्यार्थी १५ सयका दरले चार जना विद्यार्थीहरुलाई छात्रवृत्ति सहयोग प्रदान गर्नुभएको थियो ।

विजेता टोलीहरूलाई ट्रफी, प्रमाणपत्र तथा पुरस्कार प्रदान गरिएको थियो । सोही अवसरमा बोल्दै गुल्मीदरबार गाउँपालिका अध्यक्ष सरोज कुमार थापाले आयोजक संस्थालाई धन्यवाद ज्ञापन गर्दै आफु जन्मिएर हुर्किएको ठाउँलाई सम्झेर पालिकामा समय–समयमा विभिन्न सामाजिक कार्यक्रम गरी सकारात्मक सन्देश प्रवाह गरेको भन्दै प्रशंसा व्यक्त गर्नुभएको थियो । उहाँले गाउँपालिकाबासीहरुको हितका लागि गरिएका रचनात्मक कामहरुले आफुहरुलाई पनि हौसला र प्रेरणा मिलिरहेको बताउनुभयो । यस्तै वडा नं. ६ का अध्यक्ष मुकेश थापा, संस्थाको तर्फबाट हेमलाल भुसाल, प्रधानाध्यापक इन्द्र बहादुर थापाले पनि शुभकामना मन्तव्य राख्नुभएको थियो । हाजिरिजवाफ प्रतियोगिता समापन भएसँगै सांस्कृतिक कार्यक्रमद्वारा मनोरञ्जन प्रदान गर्ने सम्पूर्ण विद्यार्थीहरुलाई समेत नगद सहित पुरस्कृत गरिएको थियो । विद्यार्थीहरूमा सामान्य ज्ञान, सामूहिक भावना, बौद्धिक क्षमता र आत्मविश्वास विकास गर्ने उद्देश्यले सो प्रतियोगिताको आयोजना गरिएको समाजकी अध्यक्ष उषा खत्रीले बताउनुभयो ।

पीडितहरुलाई आर्थिक रुपमा सहयोग पु¥याउँदै आएको यस संस्थाले स्वास्थ्य र शिक्षालाई प्रमुख प्राथमिकतामा राखेर विभिन्न कार्यक्रमहरु गर्दै आइरहेको अध्यक्ष खत्रीले उल्लेख गर्नुभयो । संस्थाले रुपन्देहीमा बसोबास गर्ने गुल्मी चारपालाबासीहरुलाई एक ढिक्का गराउँदै विभिन्न सन्दर्भमा आर्थिक अभावमा परेर उपचार नपाएकाहरुका लागि पनि सहयोग पु¥याउँदै आएको अध्यक्ष खत्रीले बताउनुभयो । उक्त कार्यक्रम संयोजक संस्थाका कुल प्रसाद भुसाल, राजेश थापा, रमेश कार्की रहनुभएको थियो। हाजिरिजवाफ प्रतियोगिताको सहजीकरण मीरा कोषका महासचिव रामचन्द्र पौडेले गर्नुभएको थियो भने सञ्चालन सचिव विकास टण्डनले गर्नुभएको थियो । कार्यक्रममा कार्यपालिका सदस्य सोनुदेवी कार्की, विभिन्न विद्यालयका प्रधानाध्यापक, शिक्षक, विद्यार्थी, अभिभावक तथा स्थानीय समाजसेवीहरुको बाक्लो सहभागिता रहेको थियो । गुल्मीदरबार गाउँपालिका चारपालाबाट रुपन्देहीलाई कर्मथलो बनाएर बस्नुभएका गुल्मेलीहरुको संस्था गुल्मी चारपाला रूपन्देही सम्पर्क समाजले स्थापना भएदेखि सामाजिक कार्यमा समेत अग्रणी भूमिका निभाउँदै आएको छ । २०७५ फागुनमा स्थापना भएको उक्त संस्था छोटो अबधिमै थुप्रै पीडित र असाहयहरुको साहारा बनेको छ ।