४५ वर्षपछि चौरास्तामा बैरागी काइँला

पारिजातको प्रेमी धनवीर मुखिया कमानको जागिरे थिए । उनी प्रेमीसँगै दार्जिलिङको त्यो घरमा भाडामा बस्थिन् । हामीलाई लालकोठीको घरधनी चन्द्र राईले यो जानकारी गराए ।

पारिजातलाई निकै बोल्ड क्यारेक्टरको रूपमा लिइन्छ साहित्यमा । यसैले पारिजातको घर हेर्नकै लागि कृष्ण बराल, पर्वत पोर्तेल र म चौरास्ताबाट ओरालो गल्ली झर्‍यौं ।

त्यो गल्ली प्रकाश कोविदको प्रख्यात औपन्यासिक गल्ली रहेछ । म उनको उपन्यास पढेको सम्झनामा हराउन थालें । त्यो गल्ली त्यति सफा थिएन । बाइक र गाडीहरूको पनि ओहोरदोहोर चलिइरहेको थियो । लथालिङ्ग खानेपानीको पाइप, फोहोर र रोडामा मानिसहरू हतारहतार हिँडिरहेका थिए ।