संसदीय मामिला पत्रकार समाज लुम्बिनीको अध्यक्षमा घनश्याम गौतम

गुल्मी पुस २१

संसदीय मामिला पत्रकार समाज लुम्बिनी प्रदेशको अध्यक्षमा  रेसुङ्गा न्यूजका सुभेच्छुक तथा बरिष्ठ पत्रकार घनश्याम गौतम निर्विरोध निर्वाचित हुनुभएको छ । शनिबार लुम्बिनीमा सम्पन्न समाजको दोस्रो अधिवेशनले गौतमको नेतृत्वमा नयाँ नेतृत्व सर्वसम्मत चयन गरेको हो ।

अधिवेशनबाट उपाध्यक्षमा केपी घिमिरे, महासचिवमा नारायण खडका, सचिवमा दिपक घिमिरे र राधा बस्नेत, कोषाध्यक्षमा दशरथ घिमिरे निर्विरोध निर्वाचित हुनु भयो । त्यसैगरी सदस्यहरुमा टोपराज शर्मा, अमरराज भण्डारी, यमकला भुसाल, छवि पुरी, किरण जिसी र अर्जुन अधिकारी निर्वाचित हुनुभएको छ।

अधिवेशनले नौ बुँदे लुम्बिनी घोषणापत्र समेत जारी गरेको छ । घोषणापत्रमा कानुन सम्मत ढंगले सञ्चालित आमसञ्चारका माध्यमहरुको संरक्षण र सम्वद्र्धनका लागि तीनै तहका सरकारलाई विशेष प्याकेज सहितको व्यवस्था गर्न अनुरोध गर्दै लोककल्याणकारी विज्ञापनलाई नियमित र समानुपातिक ढंगले वितरणका निम्ति सरकार समक्ष आग्रह गरेको छ । यसैगरी संसद भवनमा आवश्यक मिडिया सेन्टर निर्माण गर्न तथा सूचनामा सहज पहुँचको प्रबन्ध मिलाउन माग गरिएको छ । अमृत गिरी संयोजक तथा निरा गौतम र सन्तोष सुवेदी सदस्य रहेको समितिले तयार पारेको घोषणापत्रलाई सर्वसहमतीमा पारित गरिएको थियो ।

यसअघि अधिवेशनको उदघाटन लुम्बिनी विकास कोषका उपाध्यक्ष ल्हारकाललाल लामाले गरेका थिए ।