नयाँगाउँ प्रहरी चौकी आफनै भवन 

नयाँगाउँ प्रहरी चौकी आफनै भवन

अनिल खत्री

२८ माघ, गुल्मी । गुल्मी जिल्लाको नयाँ गाउँमा प्रहरी चौकीको उद्धाटन गरिएको छ । जिल्लाको धुर्कोट गाउँपालिका वडा नम्बर १ नयाँगाउँमा निर्माण सम्पन्न गरिएको प्रहरी चौकी भवनको उद्धाटन गरिएको हो ।

लुम्बिनी प्रदेशका प्रहरी प्रमुख प्रहरी नायब महानिरीक्षक कुबेर कडायतले एक कार्यक्रमको बीचमा प्रहरी चौकी नयाँगाउँ गुल्मीको उद्धाटन गरेका हुन् । व्यवस्थित र गुणस्तरीय भवन निर्माण गर्ने क्रममा प्रहरीले आफ्नै जग्गामा उक्त भवन बनाएको हो ।

लुम्बिनी प्रदेश प्रहरी कार्यालय दाङमार्फत जिल्ला प्रहरी कार्यालय गुल्मी अन्तर्गत धुर्कोट गाउँपालिकाको नयाँगाउँमा कुल दुई करोड ९९ लाखमा निर्माण सम्पन्न भएको इन्जिनियर प्रहरी नायब उपरीक्षक रोशन सारुले बताए । प्रहरी चौकी नयाँगाउँको निर्माणको जिम्मा अर्जुन विल्डर्स एण्ड कन्स्ट्रक्सन गुल्मीले पाएको थियो ।

२०७९ साल पुस १४ मा सम्झौता भएको उक्त भवनको १३ पुस २०८० तोकिएकै मितिमा निर्माण सम्पन्न भएको थियो । प्रहरी चौकी नयाँगाउँ उद्धाटनको क्रममा तोकिएको समय अगावै निर्माण सम्पन्न गर्ने निर्माण व्यवसायी विजय खनाललाई सम्मान गरिएको थियो ।

कर्यक्रममा धुर्कोट गाउँपालिका उपाध्यक्ष सीता गिरीले आवश्यकता अनुसार प्रहरी जनशक्ति पुर्ण रुपमा हुनुपर्ने बताइन् । उनले नयाँगाउँमा निर्माण सम्पन्न उक्त भवनबाट प्रदान हुने सेवाले थप सुरक्षाको अनुभुती हुने बताएकी थिइन् ।

गुल्मीका प्रमुख जिल्ला अधिकारी कृष्णप्रसाद शर्माले नागरिकको घरदैलोमा पुगेर सेवा दिने कोसिस गरिरहेको बताए । उनले गुल्मीको प्रहरी सेवाबाट नागरिक सन्तुष्ट रहेको बताएका थिए ।

प्रहरी चौकी नयाँगाउँको उद्धाटन गर्दै लुम्बिनी प्रदेशका प्रहरी प्रमुख प्रहरी नायब महानिरीक्षक कुबेर कडायतले हाल सम्पन्न भवन आम नागरिकको सेवाको लागि पर्याप्त भएको बताए । उनले तीनै तहका सरकारको सरोकारमा रहेको प्रहरीलाई अत्याधुनिक बनाउनुपर्नेमा हाल यो भवन बनेको बताए ।

उनले उच्च मनोबलका साथ प्रहरीले सेवा प्रदान गर्नुपर्ने बताए । अब गुणस्तरीय कार्यालयमार्फत दिने सेवामार्फत थप राहात दिने र सेवाग्राहीलाई खुसी महशुस हुने गरि सेवा दिन निर्देशन दिए ।

भवनमा कार्यालय, ब्यारेक, भान्छा घर र शौचालय निर्माण सम्पन्न भएका हुन् । साढे दुई तलाको उक्त भवनमा भुँइतलामा एक सय ५७ वर्गमिटरमा चार कोठा कार्यालयका लागि, पहिलो तलामा एक सय ४३ वर्गमिटरमा तीन वटा कोठा ब्यारेकको लागि, महिला कर्मचारीका लागि छुट्टै शौचालयसहित ब्यारेक, दोस्रो तलामा ९८ वर्गमिटरमा कार्यालय प्रमुखसहित संचार शाखा तथा ब्यारेकको लागि, २९ वर्गमिटरमा भान्छा घर र ८ वर्गमिटरमा शौचालयसहित स्नान गृहको निर्माण गरिएको छ ।

हाल जिल्ला भर प्रहरीका २७ वटा युनिट रहेका छन् । त्यसमध्ये ११ वटा प्रहरीका युनिट भाडाको भवनबाट सेवा दिदै आएको जिल्ला प्रहरी कार्यालय गुल्मीका प्रहरी उपरीक्षक डिल्लीनारायण पाण्डेले बताए ।

केहि प्रहरी चौकी अत्यन्तै जीर्ण भवनबाट सेवा दिदै आएका छन् ।